News

“မတည်ငြိမ်တဲ့ ဒေါ်လာဈေးကြောင့် နှစ်ခါပြန် အမြတ်ရနေတဲ့ ဆီဆိုင်ကြီးတွေရဲ့ လောဘနှင့် လုပ်စားအကွက်များ”

“စက်သုံးဆီနှင့် ဝိသမလောဘ”

စက်သုံးဆီတွေပြတ်နေပြီဆိုတဲ့ ကောလဟာလကြောင့် ဆီဆိုင်တွေမှာ ကြိတ်ကြိတ်တိုးပြီး အထိတ်တလန့်ဖြစ်ကုန်ကြတယ်.. ဒီလိုဖြစ်တာကိုလဲ တချို့က ဝမ်းသာနေကြတယ်.. စက်သုံးဆီနဲ့ပတ်သက်လို့ ဘဝင်မကျတာ ကြာပါပြီ ဒေါ်လာနဲ့ဝယ်ရတယ်ဆိုတာ နားလည်ပေမယ့် ဒေါ်လာစျေးတက်တာနဲ့ နာရီမဆိုင်းပဲ ဆီစျေးလိုက်တက်ပြီး စျေးလဲကျရော ဆီစျေးက မကျတာ လူတိုင်းအသိပါ..

စက်သုံးဆီဆိုတာကလဲ အနည်းဆုံး ၃ လလောက်ကြိုဝယ်ထားရတာ ဒေါ်လာစျေးတက်ပေမယ့် သူတို့ဝယ်ထားတာက အရင် ၃ လကစျေး အရင်ဒေါ်လာစျေးနဲ့ရောင်းလို့ရပေမယ့် သူတို့အကြောင်းပြချက်က အခုပြန်ဝယ်ရင် တက်စျေးနဲ့မိမှာမို့လို့တဲ့.. ကောင်းပါပြီ ဒေါ်လာစျေးကျတော့ရော ဘာလို့စျေးမကျတာလဲဆိုတော့ အခုရောင်းနေတာက အရင်တက်စျေးနဲ့ ဝယ်ထားတာမို့လို့ပါတဲ့.. ဘယ်လိုပဲပြောပြော ပြည်သူအများစုကတော့ ခံဘက်ကချည်းပဲ..

ဒေါ်လာစျေးတက်တက် ကျကျ စားသာတာက သူတို့ပဲလေ အဓိက အကြောင်းကတော့ စက်သုံးဆီစျေးကွက်ကို လူ ၅ ယောက်လောက်က ချုပ်ကိုင်ထားတဲ့ မိုနိုပိုလီဖြစ်နေလို့ပါပဲ.. သူတို့အချင်းချင်းညှိပြီးလုပ်ရင် ဘာမှလုပ်လို့မရဘူး.. ဒီနေရာမှာ အများတကာ ကြားဖူးတဲ့ ဆိုရိုးတစ်ခုကို ကိုးကားချင်ပါတယ်..

ဂျပန်ခေတ်မှာပေါ့လေ မြန်မာတွေ ခေါင်း၊ ပန်းလှန်နေတဲ့ ကစားဝိုင်းကို ဂျပန်တစ်ယောက် ရောက်လာတယ်.. စိတ်ဝင်စားလို့ ကြည့်နေတာနဲ့ သူလဲကစားမယ်ဖြစ်လာတာပေါ့.. မြန်မာက ခေါင်း၊ ပန်းလှန်ရင်း ဒီမှာခေါင်းကျတယ် ဘိရုမာစားမယ်.. ဟောဒီတစ်ခါတော့ ပန်းကျတယ် ဘိရုမာစားမယ်.. အဲဒါနဲ့ ၄/၅ ခါလောက်ရှိလာတော့ ဂျပန်က မေးလာတော့တယ်.. “ခေါင်းကျလဲ ဘိရုမာစားတယ် ၊ ပန်းကျလဲ ဘိရုမာစားတယ် မာစတာ ဘယ်တော့ စားရမှာလဲ” တဲ့.. အဲဒီတော့ “မာစတာက ဒေါင်လိုက်ကျရင် စားရမယ်” လို့ ပြောလိုက်ရော အခုလဲ ပြည်သူလူထုက ဒေါင်လိုက်ကျမှ စားရတဲ့ အခြေအနေဖြစ်နေပြီ..

နောက်တစ်ခုက ဒေါ်လာစျေးတက်တဲ့အချိန်မှာ စက်သုံးဆီ လက်ကြီးသမား ၅ ယောက်လောက်ကို တစ်နေ့တစ်နေ့ ဒေါ်လာသန်း ရာနဲ့ချီရောင်းပေးတာဟာ အလကားဖြစ်နေတယ်လို့ ထင်ပါတယ်.. ဘာဖြစ်လို့လဲဆိုတော့ အဲဒီဆီဆိုင်တွေက ဘယ်ဆိုင်မှာ ရောင်းပေးပါမယ်လို့ပြောလဲ သွားတဲ့အခါ ကိုယ်တာကုန်သွားပါပြီ ၊ မရှိတော့ပါဘူးဆိုပြီး အပြင်စျေးနဲ့ရောင်းတာ အမြဲကြုံနေရပါတယ်.. မှတ်မှတ်ရရ အစိုးရက ဒေါ်လာရောင်းပေးပြီးနောက်ပိုင်း လျှော့စျေးနဲ့ ရတာဆိုလို့ တစ်ခါပဲ ရှိခဲ့ပါတယ်..

အစိုးရကရောင်းပေးတဲ့ ဒေါ်လာနှုန်းထားနဲ့ ဘယ်ဆိုင်မှာ ဘယ်လောက် ရောင်းသလဲ ? ဘယ်စျေးနဲ့ ရောင်းသလဲ ? ဆိုတာကို စစ်ဆေးတဲ့သူ မရှိသလို သူတို့ကလဲ လုပ်ချင်တိုင်း လုပ်နေတာပါပဲ.. သူတို့ကတော့ ၂ ခါပြန်မြတ်သလောက် ပြည်သူတွေက ခံပေါ့လေ.. အခုလဲ ကောလဟာလထုတ်ပြီး ရိုက်တင်ကြတာ ၁ လီတာကို ၂၀၀ ကျပ်ကနေ ၄၀၀ ကျပ်အထိ ချက်ခြင်း တက်ပစ်လိုက်ကြတာ ၁ ရက်ထဲနဲ့တင် သိန်းကို ထောင်နဲ့၊ သောင်းနဲ့ချီ အလုပ်ဖြစ်ကြမှာ ပြည်သူတွေကတော့ ခံပေါ့လေ..

သူများတကာ တိုင်းပြည်တွေမှာ သဘာဝဘေးနဲ့တွေ့တာဖြစ်ဖြစ် ၊ ပြည်သူတွေဒုက္ခရောက်တာဖြစ်ဖြစ် လမ်းဘေးစျေးဆိုင်တွေကအစ ပုံမှန်စျေးထက်လျှော့ရောင်းကြတယ်တဲ့.. ကိုယ့်ဆီမှာတော့ ခရိုနီ၊ ခရိုနက်တွေကအစ ဂွင်တွေ့ပြီဆိုပြီး ရိုက်စားကြတာ အောက်ကလူတွေဆို ပြောမနေနဲ့တော့.. ကျန်းမာကြပါစေ ချမ်းသာကြပါစေဗျာ..

Tony Myanmar Thiha