News

“လက်တစ်ဖက် ဖြတ်ခဲ့ရပြီးပြီလေဗျာ. . . .နောက်ထပ် ထောင်ဒဏ်တဲ့လား. . “

စစ်တပ်ရဲ့ လက်ချက်ကြောင့် လက်တစ်ဖက်ပြတ်ခဲ့ရတဲ့ အသက် ၂၃ နှစ်အရွယ် အင်ဂျင်နီယာကျောင်းသား ကိုလျှံဖြိုးအောင်ကို စစ်ကောင်စီက ထောင်ဒဏ် သုံးနှစ် မတ်လ ၂၈ ရက် ဒီကနေ့ ချမှတ်လိုက်ပါတယ်။

ပြီးခဲ့တဲ့ ၂၀၂၁ ခုနှစ် မတ်လ ၂၇ ရက်နေ့က မကွေးမြို့ ဆန္ဒပြပွဲကို စစ်ကောင်စီတပ်ဖွဲ့ဝင်တွေ ပစ်ခတ်ဖြိုခွင်းချိန်မှာ ဆန္ဒပြ ဒိုင်းကာသမား ကိုလျှံဖြိုးအောင် လက်နဲ့ ခြေထောက်တွေမှာ သေနတ်ကျည် ထိမှန်ပြီး ဖမ်းဆီးခံခဲ့ရတာဖြစ်ပါတယ်။

ကိုလျှံဖြိုးအောင်ရဲ့ ညာဘက်လက်ကောက်ဝတ် အထက်နားအထိ ဖြတ်လိုက်ရတဲ့အပြင်၊ ခြေထောက်ကျည်ထိမှန် ဒဏ်ရာနဲ့၊ ညာမျက်လုံး ခွဲစိတ်ရဖို့အထိ ဒဏ်ရာတွေရပြီး မကွေးဆေးရုံမှာ ဆေးကုသမှုခံခဲ့ရတာပါ။

၂ လလောက် ဆေးကုသခွင့်ပေးပြီးနောက် မကွေးထောင်ကို ပြောင်းရွေ့ခဲ့တာဖြစ်ပါတယ်။

သူ့ကို ရာဇသတ်ကြီးပုဒ်မ ၅၀၅ (က)နဲ့ စစ်ကောင်စီက အမှုဖွင့်ခဲ့ပြီး တစ်နှစ်အကြာ ဒီကနေ့မှာ ထောင်ဒဏ် ချမှတ်ခဲ့တာဖြစ်ပါတယ်။

ကိုလျှံဖြိုးအောင်ရဲ့ မိသားစုဝင်တစ်ဦးကတော့ အယူခံ ဆက်မတက်တော့ဘူးလို့ ပြောပါတယ်။