News

“မိုင်ပေါင်း(600) ကျော်ခရီးကို တစ်ကိုယ်တည်းဖြတ်သန်းရင်း စစ်ရှောင်ခဲ့ရတဲ့ ၁၁ နှစ်အရွယ် ယူကရိန်းကလေးငယ်ရဲ့စွန့်စားခန်း”

ယူကရိန်းအရှေ့တောင်ပိုင်းကနေ စလိုဗက်ကီးယားနယ်စပ်အထိ မိုင် ၆၀၀ကျော် ခရီးကိုစစ်ရှောင်ဖို့ သတ္တိရှိရှိ ထွက်ခွာခဲ့တဲ့ အသက် ၁၁ နှစ်အရွယ် ယူကရိန်း ကလေးငယ်ဟာ တစ်ဖက်နိုင်ငံ၊ ဘရာတီဆလာဗာမြို့မှာ သူ့ရဲ့မွေးချင်းတွေနဲ့ ပြန်တွေ့ခဲ့ပြီးနောက် ပထမဆုံးအကြိမ် စကားပြောခွင့်ရခဲ့ပါတယ်။

ဟက်စ်ဆန်အမည်ရှိတဲ့ကလေးငယ်ဟာ သူ့လက်ထဲမှာ ပလတ်စတစ်အိတ်လေးတစ်လုံး၊ အနီရောင် ကျောပိုးအိတ်လေးတစ်လုံး၊ နိုင်ငံကူးလက်မှတ်နဲ့ လက်မှာဖုန်းနံပါတ်တွေသာရေးထားပြီး နယ်စပ်ဖြတ်ကျော်ခဲ့တဲ့ ဇာတ်လမ်းဟာ ကမ္ဘာတဝှမ်းက လူတွေရဲ့နှလုံးသားကိုသိမ်းပိုက်ခဲ့ပါတယ်။

မုဆိုးမတစ်ဦးဖြစ်တဲ့ သူ့ရဲ့မိခင်ဂျုလီယာပီဆက်ကာဟာ အိုမင်းပြီး အသွားအလာမလုပ်နိုင်တော့တဲ့ မိခင်ကို စောင့်ရှောက်ဖို့ လွန်ခဲ့တဲ့ သီတင်းပတ်က ရုရှားတပ်တွေတိုက်ခိုက်ခဲ့တဲ့ သူ့မွေးရပ်မြေ ဇာပိုရစ်ဇီယာမြို့မှာ ဆက်လက် ကျန်ရှိနေခဲ့ရပါတယ်။

အဲဒီအခြေအနေကြောင့် သူဟာ သားဖြစ်သူ ဟက်စ်ဆန်ကိုစလိုဗက်ကီးယားနယ်စပ်ကို ထွက်ခွာမယ့်ရထားတစ်စီးပေါ်ကို ဘယ်လိုမှမတတ်သာဘဲ တစ်ဦးထဲတင်ပေးလိုက်ရပါတော့တယ်။

ဟက်စ်ဆန်ဟာ ပြီးခဲ့တဲ့လေးရက်ခန့်က နယ်စပ်ကိုချောမောစွာရောက်ပြီးတဲ့အခါမှာတော့ သူ့ရဲ့အပြုံးနဲ့ ရဲရင့်တဲ့ စိတ်ပိုင်းဖြတ်မှုတွေက သူ့ကို စလိုဗက်ကီးယားနိုင်ငံကို ဖြတ်ကျော်ဖို့ ကူညီပေးခဲ့တဲ့ အရာရှိတွေကို အနိုင်ယူသွားခဲ့ပါတယ်။ သူတို့တွေက ဟက်စ်ဆန်ရဲ့ဖုန်းနံပါတ်နဲ့ သူ့ခါးမှာ ချိတ်ထားတဲ့ မှတ်စုကို အသုံးပြုပြီး နိုင်ငံတွင်းမှာရှိတဲ့ သူ့ မိသားစုကို ဆက်သွယ်ခဲ့ပါတယ်။

အဲဒီနောက် အွန်လိုင်းမှတစ်ဆင့် Good Morning Britain ရုပ်သံ နဲ့အင်တာဗျူးမှာ မောင်နှမလေးယောက်နဲ့ပြန်လည်ဆုံဆည်းရတဲ့အတွက် ပျော်ရွှင်မိကြောင်း ဟက်စ်ဆန်က ပြောခဲ့ပါတယ်။ ထိတ်လန့်စရာကောင်းတဲ့အခိုက်အတန့်မှာ “ရှေ့ရေးကိုမတွေးဘူး အန္တရာယ်ကင်းလို့ ဝမ်းသာမိတယ်”လို့ ကလေးငယ်က ဆိုပါတယ်။

“အရေးကြီးဆုံးက သူ့မိသားစုရှိတဲ့ နေရာမှာ ရှိနေဖို့ပဲ” လို့ အစ်မဖြစ်သူက ဟက်စ်ဆန်ရဲ့ ပြောစကားကို ဘာသာပြန်ပေးပါတယ်။

“ဒီမြို့က ဘေးကင်းတဲ့အတွက် သူသဘောကျတယ်။ ယူကရိန်းရဲ့ အခြေအနေကို မသိတဲ့အတွက် အနာဂတ်ကိုမသိပါဘူး။ သူကအနာဂတ်ကိုတွေးမနေဘူး။ သူကကျွန်မတို့နဲ့အတူနေချင်တာ။”လို့ အမဖြစ်သူကဆိုပါတယ်။

ဟက်စ်ဆန်ဟာ တစ်ကိုယ်ရည်ပစ္စည်းအနည်းငယ်နဲ့ဝေးကွာတဲ့ခရီးကို အဖော်မပါထွက်ခွာလာပြီးနောက်မှာတော့ သူ့အကြောင်းကိုကမ္ဘာတစ်ဝန်းကအာရုံစိုက်မိခဲ့ပါတယ်။

သူ့ကို ဆလိုဗက်ကီးယား အကောက်အခွန်အရာရှိတွေနဲ့ စေတနာ့ဝန်ထမ်းတွေက ထိန်းသိမ်း‌စောင့်ရှောက်ပေးခဲ့ကြပြီး မိသားစုဝင်တွေကို ဖုန်းဆက်ကာ တစ်ဖက်နိုင်ငံထဲရောက်အောင် ကူညီပေးခဲ့ကြပါတယ်။

ဟက်စ်ဆန်ရဲ့ မောင်နှမတွေ ဆလိုဗက်ကီးယားကို ဘယ်အချိန်ထဲက ထွက်ခွာသွားတာကို ရှင်းရှင်းလင်းလင်း မသိရသေးပေမယ့် သောက‌ရောက်နေတဲ့သူတို့မိခင်ကတော့ ယူကရိန်းစစ်နယ်မြေမှာ ရှိနေ‌သေးကြောင်း အတည်ပြုခဲ့ပါတယ်။

သူ့ခရီးစဉ်ရဲ့ အကြောက်ဆုံးအပိုင်းကို မေးတဲ့အခါမှာတော့ သူစိမ်းတွေအပြည့် ဝန်းရံထားတဲ့ ရထားတွဲထဲမှာ ခရီးသွားနေရတာလို့ ဟက်စ်ဆန်ကဖြေပါတယ်။

“ရထားက လူအရမ်းပြည့်နေတယ် ။ တစ်တွဲမှာ လူ ၃၀၀လောက် ရှိတယ်”လို့ သူ့အစ်မကတစ်ဆင့် ဘာသာပြန်ပေးပါတယ်။

“ကလေးတွေနဲ့ လူတွေက ရထားတွဲခန်းထဲမှာ ထိုင်နေကြပြီး လူတိုင်းက နိုင်ငံခြားဘာသာစကားနဲ့ ပြောနေကြတာ နားမလည်ဘူးဆိုတော့ အဲဒါက သူ့အတွက် ကြောက်စရာ အကောင်းဆုံးပဲ။” လို့ အမဖြစ်သူကရှင်းပြပါတယ်။

စစ်ပွဲမတိုင်မီကာလတွေမှာ ဟက်စ်ဆန်ဟာ အလွန်ကြောက်တတ်တဲ့အတွက် နွေရာသီစခန်းမှာ တစ်ညတောင်မအိပ်ချင်ခဲ့တဲ့ သူတို့ညီအငယ်ဆုံးရဲ့ခရီးစဉ်အပေါ် ဘယ်လောက်တောင်စိတ်ပူခဲ့ရတယ်ဆိုတာ အကိုတွေကပြောပြပါတယ်။

“သူက ကျွန်တော်တို့မိသားစုမှာ အငယ်ဆုံးဆိုတော့ သူကိုယ်တိုင် လက်ဖက်ရည်တောင် မဖျော်တတ်လို့ နယ်စပ်ကို ဖြတ်ကူးမယ်ဆိုတော့သူ့အတွက် အရမ်းစိုးရိမ်ခဲ့ရတယ်။ သူက ကျွန်တော်တို့ကို မထားခဲ့နိုင်လို့ နွေရာသီစခန်း တောင် မသွားဘူး။”လို့အကိုဖြစ်သူကပြောပါတယ်။

“ကျွန်တော်တို့ အမေအကြောင်းတွေးပြီး လွမ်းတယ်”လို့လည်း အကိုအကြီးဆုံးကဆက်ပြောပါတယ်။

ဟက်စ်ဆန်ဘေးကင်းရာကို ရောက်ရှိပြီး နာရီပိုင်းအကြာမှာ မျှဝေထားတဲ့ ရုပ်သံတစ်ခုမှာတော့ စိုးရိမ်ပူပန်နေတဲ့မိခင် ဂျူလီယာက အခြေအနေ အားလုံးကို ရှင်းပြခဲ့ပါတယ်။

“ကျွန်မက မုဆိုးမဖြစ်ပြီး သားသမီးတွေလည်း များပါတယ်။ ကျွန်မသားကို ပြုစုစောင့်ရှောက်ပြီး နယ်စပ်ဖြတ်ကျော်ဖို့ ကူညီပေးခဲ့တဲ့ စလိုဗက် အကောက်ခွန်အရာရှိတွေနဲ့စေတနာ့ဝန်ထမ်းတွေကို ကျေးဇူးတင်ပါတယ်” လို့ စလိုဗက် သမ္မတနိုင်ငံ ရဲတပ်ဖွဲ့က တင်ထားတဲ့ရုပ်သံဖိုင်မှာသူက ပြောခဲ့ပါတယ်။

“ကျွန်မသားလေးရဲ့အသက်ကို ကယ်ခဲ့တာ ကျေးဇူးတင်တယ်။ ကျွန်မတို့မြို့ဟာ ရုရှားတွေ ပစ်ခတ်နေတဲ့ နျူကလီးယား ဓါတ်အားပေးစက်ရုံနားမှာရှိပါတယ်။

ကျွန်မအမေကို မထားခဲ့နိုင်ဘူး။ သူကသူ့ဘာသာ မလှုပ်ရှားနိုင်တော့ဘူး။ ရှင်တို့ ရဲ့နိုင်ငံ‌သေးသေးလေးမှာ မေတ္တာကြီးမားသူတွေနေနေကြပါတယ်။” လို့ဂျုလီယာကဆိုခဲ့ပါတယ်။

ဟက်စ်ဆန်ရဲ့အကြောင်းကိုတော့ စလိုဗက်ကီးယား ပြည်ထဲရေးဝန်ကြီးဌာနရဲ့ ဆိုရှယ်မီဒီယာမှာ ဦးစွာ မျှဝေခဲ့တာဖြစ်ပါတယ်။

သတင်းဆောင်းပါး-စံတော်ချိန်ဒစ်ဂျစ်တယ်

ကိုးကား- Daily Mail

စံတော်ချိန်ဝက်ဘ်ဆိုက်