News

“KNU ၏ ဖမ်းဆီးခြင်းခံလိုက်ရသော စစ်ကောင်စီတပ်ဖွဲ့ဝင် ၇ ဦးကို ပြန်လွှတ် ပေးရန် စစ်တပ်က တောင်းဆို”

ရန်ကုန်၊ ဒီဇင်ဘာ ၃၁

ကရင်ပြည်နယ်၊ KNU တပ်မဟာ ၆ နယ်မြေ ၊ လေးကေ့‌ကော်ဒေသတွင် ယမန် နေ့က ဖမ်းဆီးခံလိုက်ရသော စစ်ကောင်စီတပ်ဖွဲ့ဝင် ၇ ဦးကို ပြန်လွှတ်ပေးရန် စစ်တပ်ဘက်က ယမန်နေ့ညနေပိုင်းတွင်တောင်းဆိုလာကြောင်း PDF စစ်ဘက်ဆိုင်ရာ သတင်းရပ်ကွက်များထံမှ သိရှိရသည်။

“စစ်တပ်ဘက်က ပြောတာကတော့ ရိက္ခာသွားပို့တဲ့ စစ်သားတွေ။ တိုက်ပွဲဝင် နေတဲ့သူမဟုတ်ဘူးပေါ့။ ဒါပေမယ့် သူတို့လာတာက ရိက္ခာတင်တဲ့ကားနဲ့လာတာမဟုတ်ဘူး။

အိမ်စီးကားနဲ့ အရပ်သား အယောင်ဆောင်ပြီး လာတာ။ လမ်းမှားသွားရင်း သူတို့ အဖမ်းခံရတာ။ ကားထဲမှာလည်း လက်နက် အပြည့် အစုံနဲ့ အပြင် သူတို့အားလုံးမှာလည်း ကျည်ကာ အပြည့်အစုံ ရှေ့တန်းထွက်ဝတ်စုံနဲ့မိတာပါ။ ရိက္ခာလာပို့တဲ့သူဆိုတာ လုံး၀ မဟုတ်ဘူး” ဟု PDF သတင်းရင်းမြစ်က ပြောသည်။

စစ်ကောင်စီဘက်က ဖမ်းဆီးထားသော စစ်သား ၇ ဦးကို ပြန်လွှတ်ပေးရန် KNU ဗဟိုထံသို့ NCA လက်မှတ်ရေးထိုးထားသော တိုင်းရင်းသားများလက် နက်ကိုင်များအစုအဖွဲ့ မှတစ်ဆင့် တောင်းဆို လာကြောင်း သိရှိရသည်။

ဒီဇင်ဘာလ ၁၆ ရက်နေ့ကလည်း စစ်ကောင်စီတပ်ဖွဲ့ဝင် ၆ ဦးနှင့် BGF ၂ ဦးကို KNU က ဖမ်းဆီးခဲ့ပြီး ၎င်းတို့ကို ကောင်းမွန်စွာ ထားရှိထားကြောင်း KNU က တရားဝင် သတင်းထုတ်ပြန်သည်။