ဗဟုသုတ

စားစရာပြတ်လို့ ထောင်ထားသည့်အလံဖြူကို စစ်ကောင်စီခန့် အုပ်ကြီးက ဖြုတ်ခိုင်း

ဝေယံမိုး – မဇ္ဈိမ

စစ်အာဏာသိမ်းကာလ ကိုဗစ်တတိယလှိုင်းပြင်းထန်နေချိန် စားစရာပြတ်တောက်မှုနှင့်ကြုံရခြင်းကြောင့် အလံဖြူထောင်ထားသည်ကို စစ်ကောင်စီခန့်အုပ်ချုပ်ရေးမှူးမှ လာရောက်ဖြုတ်ခိုင်းမှု ရန်ကုန်၊ မြောက်ဒဂုံ၊ ၄၃ ရပ်ကွက်တွင် ဖြစ်ပွားခဲ့သည်။

“အဲ့မှာအဖွားကနှစ်ယောက်အိမ်ငှားနေတာပါ၊ အိမ်လခတောင်မပေးနိုင်ဘူး၊ ၂၃ ရက်နေ့က အလံဖြူထောင်တာ အလံဖြူဆိုတာတော့ အစားအသောက်ခက်ခဲရင်ထောင်တာမျိုးပေါ့၊

အဲ့လိုထောင်တော့ လှူနိုင်တဲ့သူတွေကလာလှူကြတာမျိုးရှိတယ်၊ နောက်ရက်ရောက်တော့ စစ်ကောင်စီကခန့်ထားတဲ့အုပ်ကြီးက အဲ့အဖွားတွေကို ရုံးကိုလာရှင်းခိုင်းတာ၊ သူတို့လဲကြောက်လို့ အလံကို ဖြုတ်ပေးလိုက်ကြတယ်” ဟုရပ်ကွက်နေလူငယ်က မဇ္ဈိမကိုပြောသည်။

အဆိုပါရပ်ကွက်၏ အုပ်ချုပ်ရေးမှူးမှာ အသက် ၄၀ အရွယ်ခန့် ကိုနေလင်းအောင်ဟုသိရပြီး အာဏာသိမ်းစစ်ကောင်စီက ခန့်အပ်ထားခြင်းဖြစ်သည်။

ရပ်ကွက်အတွင်း အလံဖြူထောင်ခြင်း၊ လာရောက်လှူဒါန်းခြင်းကိစ္စအား သူ့အားအကြောင်းကြားရမည်ဟု ပြောဆိုသွားကြောင်းသိရသည်။

“သူတို့ရောက်လာတော့ အလံဖြုတ်ခိုင်းတာတင်မကဘူး၊ ဘယ်သူတွေလှူတာလဲ၊ ဘယ်အဖွဲ့ကလဲ၊ ဘာတွေလှူတာလဲဆိုပြီး မေးတယ်၊ နောက်ကို သူတို့ကို အသိပေးရမယ်ဆိုပြီးပြောသွားသေးတယ်၊ အဖွားဆို လှူတဲ့ပစ္စည်းတွေတောင်မစားရဲတော့ဘူး၊ သူကတော့ကြောက်တာပေါ့” ဟု အိမ်နီးဝန်းကျင်တစ်ဦးကဆိုသည်။

ဇူလိုင်လ အစောပိုင်း ကိုဗစ် တတိယလှိုင်းပြင်းထန်ချိန်မှစ၍ အစားအသောက်အကူအညီလိုသူများ ၊ဆေးဝါးအကူအညီလိုသည့်အိမ်များမှ အလံဖြူထောင်ကြရန် ထိုအိမ်များအား ကူညီကြရန် နိုင်ငံရေးတက်ကြွလှုပ်ရှားသူများက နှိုးဆော်ထားကြခြင်းဖြစ်သည်။