ဖမ်းဆီးထိန်းသိမ်းခံထားရသည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့်နှင့် နေပြည်တော်ကောင်စီဥက္ကဌ ဒေါက်တာမျိုးအောင်တို့ ယနေ့(ဇွန် ၁၅)ရုံးချိန်း မစတင်မီ နာရီဝက်ကျော် တွေ့ဆုံခွင့်ရခဲ့ကြကြောင်း သိရသည်။
တရားလွှတ်တော်ရှေ့နေ ဒေါ်မင်းမင်းစိုးက”ဒီနေ့ အမှုပေါ့။ ၅၀၅(ခ)နဲ့ ပတ်သတ်တဲ့အမှုက စစ်ရမှာဆိုတော့ သူတို့ ၃ယောက်စလုံးနဲ့ ကျွန်မတို့ နဲ့ တပြိုင်နက်တည်း တွေ့ရတာပါရှင့်”ဟု ပြောသည်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေဖြင့် သမ္မတ ဦးဝင်းမြင့် ၊ ဒေါက်တာမျိုးအောင်တို့နှင့် တွေ့ဆုံခွင့်ရလိုကြောင်း ဇွန်လ ရရက်နေ့ ရုံးချိန်းတွင် တောင်းဆိုခဲ့ပြီးနောက် ယနေ့တွင် ပထမဆုံးအကြိမ်အဖြစ် ၃ဦး တွေ့ဆုံခွင့်ရခဲ့ခြင်းဖြစ်ကြောင်း သိရသည်။
“သူတို့ ၃ဦးစလုံးနဲ့ ရှေ့နေတွေနဲ့ သီးသန့်တွေ့တယ်လို့ ပြောလို့ရပါတယ်။ အခန်းထဲမှာ ကျွန်မတို့ကြီးပဲ တွေ့ဆုံပြီး ပြောကြရတာပါ”ဟု ဒေါ်မင်းမင်းစိုးက ဆိုသည်။
ယနေ့ ရုံးချိန်းတွင် ဒေါ်အောင်ဆန်းစုကြည်ကို ထပ်မံစွဲဆိုထားသည့် သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ (၂၅)နှင့် အတိုင်ပင်ခံပုဂ္ဂိုလ်၊ သမ္မတနှင့် နေပြည်တော်ကောင်စီဥက္ကဌ ဒေါက်တာမျိုးအောင်တို့ ၃ဦးလုံးကို စွဲဆိုထားသည့် ပုဒ်မ ၅၀၅(ခ) စသည့်အမှု ၂မှုကို စစ်ဆေးခဲ့ခြင်းဖြစ်သည်။
ယနေ့တွင် ပုဒ်မ ၅၀၅(ခ)နှင့် ပတ်သတ်ပြီး တရားလို ဒက္ခိဏခရိုင်ဒုတိယအထွေထွေအုပ်ချုပ်ရေးမှူး ဦးစိုးစိုးရွှေနှင့် သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ (၂၅)နှင့် ပတ်သတ်ပြီး တရားလို ဦးထွန်းမြင့်အောင်(ခ) ဦးညီညီတို့ကို စစ်ဆေးခဲ့ကြောင်း သိရသည်။ ပြန်လှန်စစ်မေးခြင်းကို နောက်ရုံးချိန်းသို့ ချိန်းဆိုထားကြောင်း သိရသည်။
ဒေါ်မင်းမင်းစိုးက”အမြဲတမ်း အမေ့ကိုတွေလိုက်ရင် Strongဖြစ်တယ်။ Confidenceရှိတယ်ဆိုတဲ့ပုံစံ အမြဲတမ်းရှိနေပါတယ်”ဟုပြောသည်။
လက်ရှိတွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေဖြင့် သဘာဝဘေးအန္တရာယ်ဆိုင်ရာစီမံခန့်ခွဲမှု ဥပဒေပုဒ်မ ၂၅ ဖြင့် ၂မှု၊ ပို့ကုန်၊ သွင်းကုန် ဥပဒေပုဒ်မ ၈၊ ပုဒ်မ ၅၀၅(ခ)၊ ဆက်သွယ်ရေးပုဒ်မ ၆၇၊ မြန်မာနိုင်ငံလျှို့ဝှက်ဥပဒေပုဒ်မ ၃(၁)(ဂ)တို့ဖြင့် တရားစွဲခံထားရပြီး အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ ဖြင့်လည်း အမှုဖွင့်ခံထားရသည်။
ထို့အပြင် သမ္မတဦးဝင်းမြင့်အနေဖြင့်လည်း နေပြည်တော် ဇမ္ဗူသီရိမြို့နယ်တရားရုံးတွင် သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ ၂၅၊ ပုဒ်မ ၅၀၅(ခ)တို့ဖြင့် တရားစွဲခံထားရသည်။
အဆိုပါအမှုများထဲမှ နေပြည်တော်တွင် စွဲဆိုထားသည့်အမှုများကို ရက်ပေါင်း ၁၈ဝအတွင်း အပြီးစစ်ဆေးသွားရန် တရားရုံးက ဆုံးဖြတ်ထားပြီး ရုံးချိန်းကို အပတ်စဉ် တနင်္လာနေ့နှင့် အင်္ဂါနေ့တို့တွင် ပြုလုပ်သွားမည်ဖြစ်သည်။
ထို့ကြောင့် အဆိုပါ အမှုများကိုလာမည့် ဇူလိုင်လ ၂၆ ရက်နေ့တွင် အပြီးသတ်ဆောင်ရွက်သွားရန် ယေဘူယျ စီစဉ်ထားကြောင်းလည်း သိရသည်။
News Watch TV
